শিৱসাগৰঃ অসম মাইক্ৰ’ফাইনেন্স উদগনি আৰু সকাহ আঁচনি ২০২১ ৰ অধীনত আজি শিৱসাগৰত তৃতীয় বৰ্গৰ ঋণী গ্ৰহণ কৰা সকলক NO DUES CERTIFICATE’ বিতৰণ কৰা হয়। যোৰহাট লোকসভা সমষ্টিৰ সাংসদ তপন গগৈয়ে শিৱসাগৰ নগৰৰ বৰ্ডিং খেল পথাৰত অনুষ্ঠিত এক বিশাল জন সভাত আজি এই প্ৰমাণ পত্ৰ সমূহ আনুষ্ঠানিক ভাৱে বিতৰণ কৰে।
শিৱসাগৰ জিলাৰ সৰ্বমুঠ ১৬৭৮৬ গৰাকী মহিলাক আজি এই প্ৰমাণ পত্ৰ বিতৰণ কৰা হয়। বিভিন্ন সংস্থাৰ পৰা ঋণ লোৱা ঋণীসকলক উদগনি তথা সকাহ প্ৰদান কৰিবলৈ ২০২১ চনত ৰাজ্য চৰকাৰে অসম মাইক্ৰ’ফাইনেন্স উদগনি আৰু সকাহ আঁচনি আৰম্ভ কৰিছিল।
এই আঁচনিৰ অধীনত ৩১ মার্চ ২০২১ লৈকে যিসকল ঋণীৰ একাউণ্ট NPA হৈ আছে, তেওঁলোকক এই আঁচনিখনে তৃতীয় বৰ্গৰ অধীনত সকাহ প্ৰদান কৰিছে।
এই আঁচনিয়ে ২৫,০০০ টকালৈকে অনাদায় মূলধন পৰিমাণৰ NPA একাউণ্ট থকা ঋণীসকলক অগ্ৰাধিকাৰ প্ৰদান কৰিছে। সমগ্ৰ ৰাজ্যতে তৃতীয় বর্গত ৩০০ কোটি টকা চৰকাৰী ৰাজসাহায্য এই আঁচনিৰ অধীনত ২.২২ লাখ ঋণীয়ে লাভ কৰিছে।
আর্থিকভাৱে পিছপৰা মাইক্ৰ’ফাইনেন্স ঋণীসকলৰ পৰা চৰকাৰে এক বৃহৎ পৰিমাণৰ আর্থিক বোজা এই আঁচনিৰ জৰিয়তে দূৰ কৰিছে আৰু ইয়াৰদ্বাৰা তেওঁলোক পুনৰাই ঋণ ল’ব পৰাকৈ যোগ্য হৈ উঠিব বুলি অনুষ্ঠানত অংশগ্ৰহণ কৰি সাংসদ তপন গগৈয়ে জানিবলৈ দিয়ে।
এই অনুষ্ঠানত শিৱসাগৰৰ অতিৰিক্ত উপায়ুক্ত বিতোপন নেওগ, জিলা পৰিষদৰ মুখ্য কাৰ্যবাহী বিষয়া অশ্বিনী দলে, শিৱসাগৰ পৌৰ সভাৰ পৌৰপতি মৃণালী কোঁৱৰ আদিকে ধৰি ভালেমান গণ্য মান্য ব্যক্তি উপস্থিত থাকে।