গুৱাহাটীঃ বহু অপেক্ষাৰ অন্তত মুখ্যমন্ত্রী হিমন্ত বিশ্ব শৰ্মাই মুকলি কৰিলে মহানগৰীৰ জু ৰোডৰ শ্ৰদ্ধাঞ্জলি উৰণ সেতু। সৰ্বমুঠ ২২৮৩ মিটাৰ দৈৰ্ঘৰ উৰণ সেতু খনৰ নিৰ্মাণ ব্যয় ৩১৬ কোটি ১১ লাখ টকা।
উৰণ সেঁতুখনৰ ৰাধা গোবিন্দ বৰুৱা পথৰ দৈৰ্ঘ ১৯৭০ মিটাৰ আৰু মাডাৰ টেৰেছা পথৰ দৈৰ্ঘ ৩১৩ মিটাৰ । আটক ধুনীয়াকৈ নিৰ্মাণ কৰা উৰণ সেতুখনৰ সৰ্বোচ্চ উচ্চতা ৫ দশমিক ৭ মিটাৰ ।
উৰণ সেতু মুকলি কৰি মুখ্যমন্ত্ৰী হিমন্ত বিশ্ব শৰ্মাই কয় যে, ইয়াৰ ফলত গুৱাহাটীত যান-জঁটৰ সমস্যা হ্রাস হ’ব বুলি আশাবাদী । তেওঁ কয় যে, পথৰ যান-জঁট কমাবৰ বাবে আমি উৰণ সেতুখনৰ দৈৰ্ঘ্য বৃদ্ধি কৰিছিলো। যোৱা ২০ বছৰত গুৱাহাটীত ১ লাখ ঘৰ নিৰ্মাণ হৈছে, যি নিৰ্মাণ অপৰিকল্পিত। এখন অপৰিকল্পিত মহানগৰীক পৰিকল্পিত কৰাৰ চেষ্টা কৰিছোঁ।
কম সময়ৰ ভিতৰত সেতুৰ কাম সম্পূৰ্ণ কৰাৰ বাবে বিভাগীয় বিষয়া–কৰ্মচাৰীক ধন্যবাদ মুখ্যমন্ত্ৰীগৰাকীৰ। উৰণ সেতু নিৰ্মাণক লৈ সমালোচনা কৰা সকলক মুখ্যমন্ত্রীৰ কটাক্ষ। সমালোচনা কৰাতকৈ বিকল্প পৰামৰ্শ দিব লাগে বুলি কয় শৰ্মাই।
শৰ্মাই কয়, ভৰলুমুখৰ যান-জঁট হ্রাস কৰিবলৈ পৰিকল্পনা কৰা হৈছে। ফেব্রুৱাৰী–মাৰ্চৰ ভিতৰত ভূতনাথ আৰু মাছখোৱাত এটা ৰটাৰী পইণ্ট নিৰ্মাণ কৰা হ’ব।
তিনিলেন যুক্ত উৰণ সেতুখনৰ মাডাৰ টেৰেছা পথৰ সৈতে সংলগ্ন হোৱা অংশ দুই লেনযুক্ত ।
উল্লেখ্য যে, ২০২২ চনত আৰম্ভ হৈছিল উৰণ সেতু খনৰ নিৰ্মাণ কাৰ্য। নিৰ্ধাৰিত সময়সীমাৰ পূৰ্বে মুকলি কৰা হয় শ্রদ্ধাঞ্জলি উৰণ সেতু। ১৯ মাহৰ ভিতৰত সম্পূৰ্ণ হয় শ্ৰদ্ধাঞ্জলি উৰণ সেতু ।