বাহাৰঘাটঃ বৰবৰীত বৰভাগ জ্যেষ্ঠ নাগৰিক সন্মিলনৰ ষষ্ঠ দ্বি-বাৰ্ষিক অধিবেশন সম্পন্ন৷
অনুষ্ঠানত উপস্থিত থাকে মন্ত্ৰী জয়ন্ত মল্ল বৰুৱা আৰু নলবাৰী জিলা আয়ুক্ত বৰ্নালী ডেকা৷
বিশ্ব জ্যেষ্ঠ নাগৰিক দিৱসৰ লগত সংগতি ৰাখি আজি বৰভাগ জ্যেষ্ঠ নাগৰিক সন্মিলনৰ ষষ্ঠ দ্বি বাৰ্ষিক অধিৱেশনখন বৰবৰী থান প্ৰাংগণত দিনজোৰা কাৰ্য্যসূচীৰে অনুষ্ঠিত হৈ যায়। ৰাতিপুৱা সন্মিলনৰ সভাপতি দ্বিজেন কাকতিয়ে পতাকা উত্তোলনৰ পিছতে বন্তি প্ৰজ্বলন কৰে বৰবৰী হাইস্কুলৰ প্ৰধান শিক্ষক মনোৰঞ্জন শৰ্মাই, শ্বহীদ বেদীত বন্তি প্ৰজ্বলন আৰু মাল্যৰ্পণ কৰে ক্ৰমে বৰবৰী থান উন্নয়ন সমিতিৰ সম্পাদক প্ৰদীপ ভট্টাচাৰ্য আৰু সভাপতি দিপুল তালুকদাৰে। ইয়াৰ পিছতে স্মৃতি তৰ্পণ, বৃক্ষ ৰোপণ, বিশিষ্ট সমাজকৰ্মী চন্দ্ৰনাথ চক্ৰৱৰ্তীৰ প্ৰতিচ্ছবিত মাল্যৰ্পণ কৰে বৰবৰী হাইস্কুলৰ অৱসৰী কৃতী শিক্ষক গিৰীন্দ্ৰ চন্দ্ৰ ডেকা আৰু চক্ৰৱৰ্তীৰ কপৰিয়ালবৰ্গই। শান্তি সম্প্ৰীতিৰ পদযাত্ৰাৰ পিছতে বিষয় বাচনি সভা অনুষ্ঠিত হয়।
ইয়াৰ পিছতে দ্বিজেন কাকতীৰ সভাপতিত্বত অনুষ্ঠিত হয় মুকলি সভা। সভাত নলবাৰী চিকিৎসা মহাবিদ্যালয়ৰ প্ৰাক্তন অধ্যক্ষ ডাঃ যোগেশ শৰ্মা নিৰ্দিষ্ট বক্তা হিচাবে অংশগ্ৰহণ কৰি জ্যেষ্ঠ নাগৰিক সকলক উদ্দেশ্যি গঠনমূলক পৰামৰ্শ আগবঢ়াই।
সভাত নীলমণি ভট্টাচাৰ্য সম্পাদিত সন্মিলনৰ মুখপত্ৰ বৰভাগজ্যেতি উন্মোচন কৰি নিৰ্মল হালৈ মহাবিদ্যালয়ৰ অৱসৰী অধ্যক্ষ বীৰেন্দ্ৰ ডেকাই। আনহাতে বাবুল চন্দ্ৰ ডেকা সম্পাদিত জীৱনপঞ্জী উন্মোচন কৰে নলবাৰী মহাবিদ্যালয়ৰ অৱসৰী অধ্যাপক ডঃ দীনমণি ভাগৱতীয়ে।
সভাত মন্ত্ৰী জয়ন্ত মল্ল বৰুৱাই অংশগ্ৰহণ কৰি কয় যে জ্যেষ্ঠসকলক সেৱা কৰিব নোৱাৰাটো এটা দুৰ্ভাগ্য বুলি কয়।। সভাখন উদ্বোধন কৰে বৰবৰী হাইস্কুলৰ অৱসৰী শিক্ষক ধৰণীধৰ বেজবৰুৱাই৷৷ সভাত নলবাৰী জিলা আয়ুক্ত বৰ্ণালী ডেকা, সুৰেশ চন্দ্ৰ শৰ্মা আদি কেইবাগৰাকীও ব্যক্তিয়ে বক্তব্য প্ৰদান কৰে। সভাৰ আৰম্ভণিতে সভাৰ উদ্দেশ্য ব্যাখ্যা আৰু প্ৰতিবেদন পাঠ কৰে সম্পাদক কমল চন্দ্ৰ তালুকদাৰে। আজিৰ বিষয়বাচনি সভাত শচীন্দ্ৰ শৰ্মাক সভাপতি আৰু কমল তালুকদাৰক সম্পাদক হিচাবে লৈ এখন নতুন সমিতি গঠন কৰে৷