গুৱাহাটীঃ বৃহস্পতিবাৰে বজালী দুৰ্নীতিৰ গোচৰৰ সন্দৰ্ভত অসমৰ অপৰাধ অনুসন্ধান বিভাগে আন এজন আৰক্ষী বিষয়াক গ্ৰেপ্তাৰ কৰে।
সূত্ৰঅনুসৰি, এই মাহৰ আৰম্ভণিতে বিষয়টো পোহৰলৈ অহাৰ সময়ত পাটাচাৰকুচি আৰক্ষী থানাৰ সহকাৰী উপ-পৰিদৰ্শক শশাংক দাসক(এএছআই) আৰম্ভণিতে অভিযুক্ত হিচাপে নামাকৰণ কৰা হৈছিল। তাৰ পিছত তেওঁক অসম চিআইডিয়ে আন চাৰিজন আৰক্ষী বিষয়া আৰু দুজন গৃহৰক্ষীৰ সৈতে আটক কৰিছিল। আজি সোধা পোচাৰ অন্তত , তেওঁক চিআইডিয়ে গ্ৰেপ্তাৰ কৰে।
গ্ৰেপ্তাৰ হোৱাৰ পিছত, চিআইডিৰ এটা বিশাল দলে শশাংক দাসক লগত লৈ দ্বিতীয় মেকবুকৰ সন্ধানত প্ৰাক্তন বজালী এএছপি গায়ত্ৰী সোণোৱালৰ ভগ্নীৰ বেলতলাৰ বাসগৃহত অভিযান চলায়।
ইফালে, অসম চিআইডিয়ে গোচৰটোৰ ৰাজসাক্ষী হিচাপে উপ-পৰিদৰ্শক (এছআই) হৃষীকেশ দাসক হাজিৰ কৰাৰ সম্ভাৱনা আছে। আৰক্ষী বিষয়াজনে জেৰাৰ সময়ত তেওঁৰ বিৰুদ্ধে আৰোপ কৰা সকলো অভিযোগ স্বীকাৰ কৰিছিল।
উল্লেখ কৰিব পাৰি যে গোচৰটোত এছআই (সীমান্ত শাখা) হৃষীকেশ দাসৰ নামও সাঙোৰ খাইছিল আৰু যোৱা মঙলবাৰে চিআইডিয়ে তেওঁক মাতি পঠিয়াইছিল।