ৰঙিয়াৰ গুৰকুছিত উত্তপ্ত পৰিস্থিতি । নলবাৰীৰ দুই প্ৰৱঞ্চকক ৰাইজে আটক কৰিলে । দৰিদ্ৰ হিতাধিকাৰীৰ পৰা ভেটি লোৱাৰ মুহুৰ্তত ৰাইজে আটক কৰিলে দুই প্ৰৱঞ্চকক ।
ধৃত দুই প্ৰৱঞ্চক হৈছে নলবাৰী জিলাৰ বৰভাগৰ জাকিৰ হুছেইন আৰু নলবাৰী চহৰৰ আজাহাৰ আলী ।
অভিযোগ অনুসৰি শনিবাৰে ৰঙিয়াৰ গুৰকুছি অঞ্চলত দুই প্ৰৱঞ্চকে ভাৰত স্বচ্ছ অভিযানৰ শৌচালয় দিয়াৰ প্ৰলোভন দেখুৱাই দৰিদ্ৰ হিতাধিকাৰীৰ ঘৰে ঘৰে গৈ পৰিদৰ্শন কৰে । লগতে হিতাধিকাৰীসকলৰ পৰা বেংকৰ পাছবুক, পান কাৰ্ড আৰু আধাৰ কাৰ্ডবোৰ সংগ্ৰহ কৰি সকলোৰে পৰা এশ টকাকৈ সংগ্ৰহ কৰে । এনেদৰে গাঁওখনৰ প্ৰায় ৪০ টা দৰিদ্ৰ পৰিয়ালৰ পৰা টকা সংগ্ৰহ কৰে । সন্ধিয়া দুই প্ৰৱঞ্চক যুৱকক ৰাইজে জবাবদিহি কৰাত ওৰহি গছৰ ওৰ ওলাই পৰে । ঠগ প্ৰৱঞ্চনা কৰি ধন সৰকাবলৈ অহা বুলি গম পাই ৰাইজে আটক কৰে দুই প্ৰৱঞ্চকক । লগতে দৰিদ্ৰ হিতাধিকাৰীসকলৰ পৰা সংগ্ৰহ কৰা টকা উভতাই দিবলৈ বাধ্য কৰাই দুই প্ৰৱঞ্চকক । ইয়াৰ পিছতে উত্তপ্ত হৈ পৰে ৰঙিয়াৰ গুৰকুছি অঞ্চল ।
পিছত সচেতন লোকসকলে ৰঙিয়া আৰক্ষীক খবৰ দিয়াত আৰক্ষী উপস্থিত হৈ আৰক্ষীয়ে পৰিস্থিতি নিয়ন্ত্ৰণ কৰে । ৰাইজে দুই প্ৰৱঞ্চকক ধৰি আৰক্ষীক গতাই দিয়ে । আৰক্ষীয়ে দুই প্ৰৱঞ্চকক আটক কৰি ৰঙিয়া থানাত জেৰা অব্যাহত ৰাখিছে ।