ৰাজ্যত অব্যাহত আছে গৰুৰ চোৰাং বেহা।
ডিমৌৰ ভেঁকেলাইত ঠেক মঠাউৰিত লাগি ধৰিল গৰু কঢ়িওঁৱা মিনি ট্ৰাক।
ডিমৌ আৰক্ষী থানাৰ অন্তৰ্গত ভেকেলাইত চোৰাং গৰু কঢ়িওৱা গাড়ী দূৰ্ঘটনাগ্ৰস্ত।
গাড়ীখন ঘাইপথেদি নগৈ গ্ৰাম্যাঞ্চলৰ মথাউৰিয়েদি যাওঁতেই ঠেক ৰাস্তাত লাগি ধৰাত স্থানীয় ৰাইজে সন্দেহবসত খবৰ দিলে ডিমৌ আৰক্ষী থানাত।
উদয়পুৰৰ ভাইজান নামৰ ব্যক্তিজনে দিচাং হালোৱাটিংলৈ কঢ়িয়াই আনিছিল সন্দেহজনক ১৫ টাকৈ গৰু।
বলেৰ’ পিকআপ গাড়ীখনত পোন্ধৰটাকৈ গৰু উঠাই অনাত কেইবাটাও গৰুৰ অৱস্থা সংকটজনক হৈ পৰে।AS04/AC/6978 নম্বৰৰ গাড়ীখনত কঢ়িয়াই আৰক্ষীৰ চকুত ধুলি দি ঘাইপথেদি নগৈ গ্ৰাম্য পথেদি সৰবৰাহৰ চেষ্টা কৰোতেই মঠাউৰিৰ দুৰ্বল অংশত গাড়ীখন লাগি ধৰে।
ইয়াৰ পাছতে স্থানীয় ৰাইজৰ খবৰৰ ভিত্তিত ঘটনাস্থলিত ডিমৌ আৰক্ষী উপস্থিত হৈ পোন্ধৰটাকৈ গৰু নিজ জিম্মালৈ আনি তদন্ত অব্যাহত ৰাখিছে।
উল্লেখযোগ্য যে, গাড়ীখনত কঢ়িয়াই অনা পোন্ধৰটা গৰুৰ ভিতৰত তিনিটাৰ অৱস্থা সংকটজনক।