ৰঙিয়া মৰাণজানাত চুৰিকাণ্ড । ব্যৱসায় প্ৰতিষ্ঠানৰ চি চি টিভিৰ ফুটেজ চাই আটক চুৰিকাণ্ডত জড়িত যুৱকক ।
ৰঙিয়া মৰাণজানা চ’কত সংঘটিত হোৱা এক চুৰিকাণ্ডত জৰিত এজন যুৱকক আজি স্থানীয় ৰাইজে কৰায়ত্ব কৰি ৰঙিয়া আৰক্ষীক গতাই দিয়ে ।
জানিব পৰা মতে এদিনপূৰ্বে যুৱকজনে গ্ৰাহক হিচাপে মৰাণজানা চ’কত থকা এখন মোবাইলৰ দোকানালৈ মোবাইল ক্ৰয় কৰিবলৈ আহিছিল । মোবাইলৰ দাম-দৰ কৰাৰ চলেৰে যুৱকজনে মোবাইল এটা কৌশলৰে চুৰি কৰি লৈ যায় ।
সন্ধিয়াৰ সময়ত ব্যৱসায়ীজনে মোবাইল এটা হিচাপতকৈ কম থকাটো নিশ্চিত হয় । প্ৰতিষ্ঠানখন থকা চি চি টিভিত চোৱাত গ্ৰাহক হিচাপে অহা এজন যুৱকে মোবাইল এটা চুৰি কৰি নিয়াটো নিশ্চিত হয় ।
লগে অনুসন্ধান কৰাত চুৰিকাৰ্য্যত জৰিত যুৱকজন ৰঙিয়া মধুকুছিৰ অমৰজ্যোতি নাথ বুলি নিশ্চিত হয় । আজি যুৱকজন পুণৰ মৰাণজানা চ’কলৈ অহাত স্থানীয় ব্যৱসায়ী সকলে আটক কৰি বিজুলী পোষ্টত বান্ধিথৈ ৰঙিয়া আৰক্ষীক খবৰ দিয়ে । কিছু সময়ৰ পিচতে আৰক্ষীৰ দল ঘটনাস্থলীত উপস্থিত হৈ চোৰজনক আটক কৰি লৈ যায় ।